انا عارفك على حقيقتك

بسم الله الرحمن الرحيم

عندي اقتراح تحفه يا جدعان هيقضي على نص حالات الفوضى والبلطجه اللي بتحصل في مصر وهتلغي الكلمه الرخمه اللي الناس كلها بتقولها دلوقتي .. انا عارفك على حقيقتك انت من اعداء الثوره .. انت من فلول الحزب الوطني .. انت عضو اساسي من اعضاء الثوره المضاده وقبل ما اقول الاقتراح تعالوا نشرح اللي انا باقوله ده

هنبدا بالاخوان المسلمين اللي الناس كلها مقتنعه انهم ركبوا على الثوره رغم رفضهم على المستوى القيادي انهم يشاركوا فيها من اول يوم لكن الشباب في الجماعه نزلوا بشكل فردي ... اسال اي حد عن الاخوان هتلاقيه من غير ما يفكر بيقولك دول ركبوا على الثوره دول عاوزين ياخدوا البلد في بطونهم ..,. يا عم لا ده في صفقه واتفاق بينهم وبين الجيش . الجماعه تطلع تنفي وتؤكد انهم مش هيترشحوا للرئاسه لكن بردو مش ممكن حد يصدق لان واحد منهم قال انه هيستقيل من الارشاد وعاوز يبقى رئيس يبقى الناس تصدق ازاي ؟

ثانيا الجيش يا معلمين ما خلصش هو كمان من الكلام ده سواء من الثوار او الكتاب او حتى منهم فيهم اول ما نزلوا الشارع الناس قالتلك هيفضوا الثوره بالقوه ولما الجيش ما فضهاش ولا حاجه قاللك لا يا حبيبي دول بيخطفوا في الوطنيين وبيحجموا الثوره ولما البعيد تنحى قاللك في صفقه بينه وبين المشير علشان ما يتحاكمش وكان في حاجات بتحصل يمكن تكون بحسن نيه زي اقامته في شرم الشيخ وتاخير التحقيق معاه كانت بتزود الريبه في الصدور ولما المعلم اتحاكم واتطس حكم الناس بردو ما سكتتس . احنا ما عندناش وقت يا معلم الادله جاهزه قالولك ده هما حاكموه علشان لو كانت المحاكمه الشعبيه حكمت عليه يوم الجمعه هيبقى الحكم ملزم للجيش

ثالثا البرادعي .. وده حكايته حكايه كان عليه حمله بنت لذين من ايام الحكم البائد ولغاية دلوقتي لسه مترسخه في عقول الناس يعني مثلا قالوا ان هو سبب ضرب العراق ورغم تاكيده وتاكيدات الناس كلها بما فيهم امريكا انه تقريره عن العراق كان سلبي بس خلاص يا حلوين اللي دخل في الراس دخل ومش هيطلع حتى انا افتكرته هيعمل زي علاء ولي الدين في فيلم الناظر لما كل شويه اللمبي يقوله هو ابوك ما جاش الفرح ليه راح مطلعله شهادة الوفاه بتاعة ابوه علشان يصدق ويسكت وحتى لو عمل كده الناس مش هتصدق وكمان يا سيدي قاللك ان بنته متجوزه شخص مسيحي ورغم تاكيداته انه اسلم قبل الجواز ولا حياة لمن تنادي وبيتهيالي ان علشان الافكار دي تروح من دماغ الناس لازم البرادعي يموت شهيد

رابعا .. عمرو موسى .. بتقول مين ؟ عمرو موسى ؟ مش ده اللي لما كان وزير خارجيه كانت مصر كلها بتحبه وبتتمناه رئيس ؟ وكنا ايام الجامعه بنقعد نحكي على حكاياته في اجتماعات الامم المتحده وما كانش بيسكت لبتوع اسرائيل تعالوا بقى نشوف الراجل طلع ايه الايام دي .... بيقولك يا سيدي لما نزل التحرير اول مره كان علشان يقنع الناس تفض الاعتصام وده باوامر مباشره من مبارك وده معناه انه ما كانش معترف بالثوره ولما رشح نفسه للرئاسه قاللك ده خمورجي وما يقدرش يطلع اي اجتماع من غير ما يكون طافح ما تقولش جورج وسوف .. وبعدين اوعي حد ينسى انه من اتباع النظام السابق وكان موجود اثناء كل الممارسات اللي كان بيمارسها وخد عندك بقى التقيله دي بيقولك يا عم الحاج ان الناتو ما كانش يقدر يضرب ليبيا الا لما يوافق عمرو موسى .. والله بيتقال ال يعني حد في الوطن العربي ليه كلمه .

خامسا .. المعتصمين في ميدان التحرير .. الناس كلها اتبرأت منهم وكانهم جربه ائتلاف الثوره ومجموعة الميدان وحلف 25 يناير والجيش والشعب مع انهم وطنيين ومش بلطجيه زي ما بيتقال عليهم وما لهمش مطالب فئويه ومش عاوزين يدخلوا مجلس الشعب وما حدش فيهم هيترشح للرئاسه يعني مش عاوزين اي حاجه لنفسهم .. يبقى ليه نقول عليهم كده وليه يتفضوا بالقوه ولما الجيش خاف يدخل علشان ما حدش يقول ده فض بالقوه جاب بلطجيه بجد يمشوهم

شادي الغزالي حرب بيقولك وائل غنيم مش تبعنا والاخوان بيقولك السلفيين مش مننا والسلفيين حاطين الصوفيين في دماغهم والشرطه مش عاوزه تنزل الشارع لا والجديده والممتعه ان طلعت السادات بقى رئيس الحزب الوطني وال هيغير .. وهو فعلا غير وشال صورة مبارك وحط صورة السادات مع ان الناس كلها متفقه على ان الحزب ايام السادات كان قمة الفساد

يعني يا اخواننا كله بيخون كله وكله مش مطمن لكله .. ما تقلقوش الحل عندي بس قبل ما اقوله عاوز بس اتكلم في كلمه تانيه رخمه بتتقال دلوقتي من فئة ما يطلق عليهم فنانين

الممثل الفلاني بيقول انا اول من تنبا بالثوره في فيلمي الفلاني بس الرقابه شالت الجزء ده
يرد عليه اخينا اللي احسن منه انا اتكلمت عن مشاكل الشباب كتير قبل 25 يناير وكل اعمالي تشهد عليا

والمطرب والله بيقول برده ان مجمل اعماله كان بيحرض عالثوره مع انهم لو سكتوا ما حدش هيقول عليهم حاجه .. يا اخي ده ناقص كمان يطلع اي لاعب كوره يقولك انا هدفي الشهير هو اللي فجر الثوره اللي خلى احمد فتحي سرور يتخيل انه من مفجرين الثوره يبقى اي حد يتكلم
اخر نقطه معلش وهاقولكم الحل لانها نقطه مهمه جدا

الشباب في المحافظات يعترضون لتجاهل دورهم في الثوره ودورهم في بناء مصر كل اللي بيتكلم يقولك شباب الميدان قصدهم التحرير .. طب يا جدعان ما في بردو شباب مات واتخنق من الغاز واتصاب وهتف وفرح وزعل في كل ميادين مصر .. بس كلهم اتنسوا ما عادس حد فاكر غير شباب التحرير مع حبي واعتزازي وفخري بكل اللي كانوا موجودين هناك وخصوصا ايام موقعة الجمل

نيجي بقى يا حبايبي للحل ..

انا ممكن اضحك عليكم واقولكم ان ما فيش حل وانا كنت كل ده باستدرجوا علشان تدخلوا تقروا بس انا هاطلع اجدع منكم واقولكم على الحل

1_ نشكل لجنه من كذا حد تكون الناس كلها تثق فيه وما حدش يخونه

2_ الكذا حد دول هيعلوا تحريات عن كل مصر طبعا من حقهم يستعينوا بكذا حد تاني يكونوا بيثقوا فيهم

3_ التحريات تشمل ان ما يكونش الشخص فات من قدام اي مقر من مقرات الحزب الوطي علشان ما يكونش من الفلول وما يكونش دخل قسم علشان ما يكونش من البلطجيه وما يكونش بيشتغل علشان ما يبقاش ليه مطالب فئويه وما يكونش بيتفرج على التلفزيون علشان ما يكونش من اللي وقفوا في عند ماسيبيرو وايدوا المناوي

4_ اي حد هينجح في التحريات دي يبقى مبروك عليه هو من شباب الثوره وهنستلم كلنا شارات مكتوب عليها مش بلطجي ومش فلول ونربطها على دماغنا ونبقى ماشين في الشارع الناس تشاور علينا وتقول شباب الثوره اهم وانا باتكلم بصفة الجمع لاني متاكد انكم هتختاروني من الكذا حد الاولانيين اللي انتوا بتثقووا فيهم

وكل سنه وانتوا طيبين

Posted in: مقالات,مقالات عامة